Alumnos de Salceda de Caselas polas terras de Valle-inclán

Xoves, 02 Febreiro 2012

Por terceiro ano consecutivo pasaron os alumnos do IES de Salceda de Caselas pola Pobra do Caramiñal na xornada do xoves 2 de febreiro, cumprindo así co que xa empeza a ser unha visita tradicional deste centro educativo.

Un grupo de 55 persoas entre alumnos e mestres, comezaron a súa visita achegándose ás instalacións do Museo Valle-Inclán, onde foron guiados a través das súas dependencias pola técnica do centro, Begoña Olveira, e onde, unha vez máis quixeron colaborar coa posta en escena dalgúns textos saídos da pluma de don Ramón, entre os que non podían faltar fragmentos de “Sonata de otoño”.

O percorrido continuou fóra da Torre de Bermúdez cun paseo guiado ó longo dos lugares máis ligados ó escritor dentro da vila pobrense, pasando por Villa Eugenia, a farmacia de Tato, e a Casa Grande de Aguiar, onde de xeito complementario, estes rapaces puideron coñecer parte da historia do entorno do Castelo, o antigo barrio xudeu, a igrexa de Santiago do Deán, e dos pazos. Tamén aquí, ó pé dos muros que pechan Aguiar e O Couto, puxeron novamente en escena a lectura de fragmentos dalgunhas obras de Valle-inclán.

Logo de comer, este grupo de Salceda completou o seu paseo subindo ó miradoiro da Curota e achegándose ata o entorno do dolmen de Axeitos.